Dimana Katong pu Maluku,,?
Orang Bilang Negeri Raja-raja
Lahirkan petarung saat tanah dapa jajah
Seng taku saat di serang penjajah
Apa sakarang tinggal nama saja,,?
Dimana Katong pu Maluku,,?
Nama yang paleng terkenal sejagat raya
Tapi sakarang akang su maraya
Seng ma
mpu kasi tunju akang pu jaya
Mau badiri saja deng susa paya
Dimana Katong pu Maluku,,?
Pusat Negeri Cengkeh Pala
Dari lautan masih banya bia deng lola
Barmaeng bebas cakalang deng Bobara
Tana yang tasimpan emas deng permata
Dimana Katong pu Maluku,,?
Bangsa yang lahirkan petarung-petarung Hebat
Seng suka par mau berdebat
Kalo salah langsung dong Babat
Seng ada yang brani Hambat
Dimana Katong pu Maluku,,?
Dolo terkenal deng Negri Raja-raja
Tapi sakarang labe tertarik deng nama Desa
Cuma karna uang tutu mata
Leluhur pu perjuangan dong lupa
Dimana Katong pu Maluku,,?
Ana Adat mulai lupa sejarah
Atau ada pura-pura tutu mata
Sampe seng mau baku kele berjuang sama-sama
Apakah dong ada cari kepentingan semata,?
Dimana Katong pu Maluku,,?
Apa su lupa jati diri
Atau su seng tau harga diri
Sampe mau jual tana sandiri
Nekat par lupa moyang pu janji,,?
Dimana Katong pu Maluku,,?
Jang cuma asal jawab di Mulu
Apa Su ilang akal sampe su tadudu,,?
Mare katong bakira maju
Supaya dunia tau katong masih ada sebagai generasi Bangsa Adat Allifuru
Dimana Katong pu Maluku,,?
Semoga bisa di renungkan
Katong bisa baku gandeng tangan
Kasi Bale nama Basar yang sengaja di hilangkan
Kalo Katong Bersatu
Katong bisa kasi pica batu
Par katong pu tana Maluku.
Lumoly, 25 Januari 2020
Vigel Faubun,S.Pd
Kapitan Aksi Komunitas Kalesang Maluku
#SaveMaluku
#BetaGenerasiAdatAlifuru
#BetaKalesangMaluku
#BetaKapitan
Komentar
Posting Komentar