Dari dolo beta suka tantang arus
Biar ada ribuan virus
pengalamam yang jadi beta pung jurus
Beta seng pastiu deng dong pung mulu
Beta anggap itu angin lalu
dong cuma tau par dudu bamulu
Tapi takotang pertahankan titipan orang tatua terdahulu
Beta akan tarus tabaos
Karna Maluku bukan sekedar mitos
Hena masa waya itu adalah poros
Jadi mare, dunia milenial ini katong terobos
Beta masih dengar suara huele
Dari ujung-ujung negeri mari baku kele
Jang ada niat par saorang lai mau pele
Awas moyang bikin badan malele
Seng ada kata terlambat
Barenti tiap saat par dudu berdebat
Lebe bae katong hidop berkerabat
Itu baru orang bilang generasi Maluku yang hebat
Barenti hidop kapiting
Ini bukan ftv yang selalu berakting
Tiap momen harus ada casting
Orang lain su deng kapal tempur katong masih deng katinting
Beta masih pameri
Seng ada dalam benak par beta mau lari
Karna Maluku itu macam bidadari
Tapi selalu dianggap ana tiri
Dan beta akan tetap badiri
Untuk kasi tunju Maluku pung jati diri.
Jiku Kintal, 02 Agustus 2020
Vigel Faubun,S.Pd
Kapitan Aksi Komunitas Kalesang Maluku
Komentar
Posting Komentar