Karja hari-hari cuma mondar mandir
Sibuk bikin diri macam onta di padang pasir
Kuasai kosa kata macam seorang penyair
Parlente orang tatua seng pernah pikir-pikir
Kuliah online ini bikin orang tatua menderita
Kalo orang tatua su menderita jang tambah par duka cita
Dong babanting tulang biar dapa carita
Demi ale pung masa depan deng cita-cita
Cari kepeng itu seng gampang
Patatas, kaladi, kasbi, sampe di tipar mayang
Dong bajalang bajual par ale yang dong sayang
Ale pu masa depan dalam dong pung ingatan itu yang selalu terbayang
Jang paksa orang tatua par kirim kepeng
Ale jang anggap itu masalah enteng
Bajalang loleng cuma par dapa bonceng
Pake alasan studi hanya par jadi tameng
Kalo bersaing itu secara sehat
Jang par mau bergaul deng pacaran lalu bikin orang tatua kaya babu
Seng inga kuliah tapi inga cuma par bercumbu
Ingatan bajalang bawa orang tatua pung nasehat
Kalo hidup su menderita jang bikin tambah susah
Siang malam orang tatua gelisah
Dong simpan semua keluh kesah
Cuma par Tuhan Yang Maha Kuasa dong berserah
Demi ale dong pung impian yang terukir dalam sebuah kisah
Kalo cinta orang tatua mari serius raih masa depan
Karna setiap malam dibilik kamar ada ratapan
Sabang hari makan berkecukupan
Asal par mau lia ana pake togah wisuda itu dong pung harapan
Berdoa minta petunjuk dari yang Kuasa
Samua cita-cita ada di tangan Tuhan Yang Maha Esa
Biar katong dilahirkan dari keluarga yang biasa
Tapi harus buktikan pengorbanan orang tua itu pung hasil luar biasa
Ini cuma sekedar teguran
Jadikan ale dong pung diri itu jang murahan
Supaya bisa bikin orang tatua bangga
Dong hati babunga rasa berharga
Karna dong pung perjuangan seng sia-sia
Vigel Faubun,S.Pd
Komentar
Posting Komentar